Doctor Abdullah Alauddin Germany ke Islam Qabool karne ki wajah

Maa baap ne shuru me Dooctor Abdullallah Alauddin ko Isaaiyo ke tariqe ke mutabiq Kalisa (Girja ghar) me is niyat se daakhil kiya ki main apne bete ko isaaiyo ka bahut bada Aalim banaunga.Lekin 3 khuda hone ka aqeeda aur ye aqeeda ki Hazrat-e-Isa Alaihissalam ne apni jaan Qurban kar ke tamaam isaaiyo ke gunaho ka kaffara ada kar diya hai.Un ke zehan ne qabool nahi kiya.Is liye unho ne girja ghar ke paadriyo se in aqeedo ko samjhaane aur uski wazaahat karne ke liye kaha.To un logo ne jawab dene ke bajaae un par khuda ke inkaar karne ka fatwa laga diya. Paadriyo se maayus ho kar unhone khud se padhne aur samajhne ka sahaara liya.Un ke padhne ka shauq itna ziyadah tha ki woh 24 ghante me se sirf 2 ghante sote the.Woh khud bayan karte hain ki :

Is tarah lagaataar padhne ki wajah se meri sehat bahut hi kharaab ho gayi lekin mujhe kuchh bhi haasil nahi hua.Lekin jab main ne apne upar bharosa karna chhod diya to Allah Ta’ala ki rahmat ne meri madad kiya aur meri rahnumaai kiya.Ek kitaab padhte hue meri nazar Surah Ikhlaas aur us ke tarjame par padi.To haqiqat ko is tarah saamne dekh kar main hairaan rah gaya.Main ne apni zindagi me pahli baar ye padha ki:Na Allah ko kisi ne paida kiya aur na hi Allah ne apna koi beta paida kiya.

Us waqt tak mujhe Islam ke baare me kuchh bhi maloom nahi tha.Main ne Islam ke baare me maloomat haasil karne ke liye Germany se Istambul tak ka safar cycle se kiya.Phir main ne Quran sharif ko is niyat se padhna shuru kiya ki jis tarah aaj tak main “ Bible” ki galtiya nikaalta raha hun ab is kitaab ki galtiya nikaalunga.Lekin is kitaab ko main jaise jaise padhta gaya mera imaan badhta chala gaya aur aakhir mujhe yaqeen ho gaya ki Yahi aakheri aur sachchi hidayat hai aur ye Allah Ta’ala ki kitaab hai jo har tarah ki galtiyo se paak hai.Phir main ne Istambul hi me Islam qabool kar liya.Aur Main Allah Ta’ala ka shukr ada karta hun ki us ne mujhe ye daulat nasib farmaya.

(Ham Musalman kyun hue,Page No.149-151.)