Etaraz No.1:Islam talwar ke zor se phaila hai.

Eteraz:Islam talwar ke zor se phaila hai.Musalmano ne taaqat-o-dabdaba aur hathyaro ke zor par logo ko Islam qabool karne par majbur kiya aur log un ke saamne bebas ho kar majburi mein kalma padh kar musalman ho gaye.

Jawab:Islami taarikh padhne wala chhota se chhota bachcha bhi ye jaanta hai ki Jab is zulm se bhari dunya mein Insaaniyat ke Muhsin-e-Azam Sallallaho alaihe wasallam ne hidayat ka chiraag jalaya aur logo ko Islam laane ki dawat di to kuchh logo ke elawah pura arab khaas taur se Makka ke kaafir gusse mein aape se bahar ho gaye.Phir un logo ne Haq ki is dawat qabool karne walo par zulm-o-sitam ke aise aise pahaad tode jin ke sochne hi se kaleja kaanp jaata hai aur aankhein pathra jaati hain.

Us zamaane mein musalman hone ka matlab hi ye tha ki apne tan mann aur dhan se apna haath dholo aur zaalim ke zulm ka har teer apne sine par lene ke liye tayyar ho jaao.saath hi apne khaandan aur society ki sakht mukhalifat ke liye bhi tayyar ho jaao.Lekin mukhalifato aur rukaawato ke is sakht toofan mein bhi log Islam qabool karte rahe aur dekhte hi dekhte woh chirag-e-haq jise Huzur ne jalaaya tha bahut hi kam saalo mein apne noor se dunya ke goshe goshe ko raushan kar diya.

Kya dunya ka sab se bada bewaqoof insaan bhi aisa soch sakta hai ki jis mazhab mein haqqaniyat aur sachcha’ee nahi thi aur jis ko apna ne mein koi bhal’ee nahi thi aur jin ke maan ne walo ke paas khaane ko khaana aur rehne ko thikana nahi tha.Maal-o-daulat ki kami aur dunya bhar ki mukhalifat ke baad bhi unhone dunya ke 3 barre azamo par apni azmat ka jhanda talwar ke zor se phailaya hoga?Hargiz nahi.Phir ye kehna ki Islam talwar ke zor se phaila hai.Kis qadar bakwas wali baat hai.

 

Chalye! Us zamaane ki baat chhodye Hindustan hi ki taarikh ko dekh lijiye.Ye baat sab log jaante hain ki Hindustan mein jin ki wajah se sab se zyada Islam phaila woh Hazrat-e-Khawja Garib Nawaz ki zaat-e-Paak hai.Jis waqt woh Hindustan mein aaye us waqt yahan par jagah jagah par hindu raajao ki hukumat thi.Magar aap ke saath na koi fauj thi aur na hi koi lashkar tha.Haath mein na talwar thi aur na hi aur koi jangi saamaan tha.Bas kuchh sufi maanush logo ka ek chhota sa qaafila tha.Jin ke jhole mein miswak,surma daani aur kuchh zarurat ke saamaan the.Magar dunya ne dekha ki bahut jald hazaaro ki ta’adaad mein logo ne un ke haath par Islam qabool kiya.Ab apne aap se sawal kijiye ki un hazaaro logo ke sar par kis ne talwaar rakh kar un ko Islam laane par majbur kiya tha?

Chalye ise bhi chhodiye ! America jo aaj ke zamaane mein khaas Islam ke mukhalif mulk hai.Aur jahaan par raat din logo ke dilo mein Islam se nafrat paida kiya jaata hai.Aur jahaan par Islam qabool karna ek bada hi sakht jurm samjha jaata hai.Ek report ke mutabiq 2002 se 2012 tak 16 laakh logo ne Islam qabool kiya.Aur abhi sab se zyada tezi se islam wahin par phail raha hai.Ab aap soche ki America mein un logo ke saro par kaun talwaar chalaata hai jin ke saamne majboor ho kar log tezi ke saath Islam qabool kar rahe hain?

Is ke elawah dunya ke hazaaro log jo Isaa’ee,Hindu,Budhmat wagairah ke maan ne wale gharo mein paida hue aur woh dunyawi etebaar se kaafi khush-haal bhi the.Un mein koi science ke maidan ka baadshah tha,To koi likhne aur padhne ki dunya ka shah-sawaar tha,To koi khel ki dunya ka raja tha.In logo ne Islam qabool kiya jinhein har koi jaanta hai aur aaj bhi bahut saare aise log maujood bhi hain.In logo ko kis ne talwaar dekhaaya?

Agar in tamaam sawalo ka jawab sirf yahi hai ki kisi ne nahi balki ye un ke dil ki awaaz thi jis par un logo ne apni marzi se amal kiya.To phir ye kehna ki Islam talwaar ke zor se phaila hai.Kaise sahi hai aap khud faisala kar lein.

Aur haan! Ye baat bhi yaad rakhe ki Islam naam hi hai Allah aur us ke Rasool ko dil se maan ne ka.Aur talwaar ke zor se jism jhukaaya jaa sakta hai dil nahi.Aur agar koi majburi mein kalma padhta hai jab ki dil se nahi maanta to woh musalmaan hai hi nahi.Aur Allah Ta’ala ka farmaan hai ki “Deen mein koi zabardasti nahi” Is liye kisi musalman ka kisi ko kalma padhne par majboor karna durust hi nahi hai.