Etaraz No.3: Quran Allah Ta’ala ki kitab nahi hai.

Eteraaz:  Quran, Jise musalman puri dunya ke paida karne wale khuda ki kitaab aur kalaam maante hain.Ye haqiqat mein khuda ki kitaab nahi.Balki un ke Nabi ki likhi hui kitaab hai,Jise unhone apne dimag se tayyar kar ke logo ke saamne pesh kiya tha.

Jawab:  Quran sharif par ye eteraaz sab se pehle Makka ke kaafiro ki taraf se us waqt kiya gaya tha.Jab Aap Sallallaho alaihe wasallam apne zamaane ke bhatke hue logo ko Islam qabool karne ki dawat de rahe the.Aur un ko un ke aur saari dunya ke paida karne wale khuda se jodne ki koshish farmaa rahe the.Aap Sallallaho alaihe wasallam ne unhein ye bataya ki ye Quran,Tumhare usi Rab ka kalaam hai jis ne aasmaan ke chhat ko apni qudrat se begair kisi sutoon (Pillars) ke qayam farmaya aur zameen ko paani par bichhaya.Aur jis ne tumhe aur saari dunya aur har chiz ko paida farmaya.Us ne tumhari hidayat ke liye ye kitaab utaara.Is liye tum use qabool karo aur us ke bataye hue tariqe ke mutabiq apni zindagi guzaaro taaki tum dunya aur aakhirat mein kaamyab ho sako.

Jin ki Qismat mein nek bakhti thi unho ne is par yaqeen kiya aur kaamyab hue.Magar bahut saare logo ne ise maan ne se inkaar kar diya aur kehne lage ki Ye hamare Rab ka kalaam nahi.Balki ye to khud Muhammad (ﷺ) ka kalaam hai jis ko ye akele mein baith kar tayyar karte hain aur galat tariqe se kehte hain ki ye puri dunya ke paida karne wale khuda ka kalaam hai.

Us waqt Allah Ta’ala ne inkaar karne walo ko khud jawab dete hue Apne pyare Nabi Sallallaho alaihe wasallam par ye aayat utaara.Jis mein irshad farmaya ki:

وَ اِنۡ کُنۡتُمْ فِیۡ رَیۡبٍ مِّمَّا نَزَّلْنَا عَلٰی عَبْدِنَا فَاۡتُوۡا بِسُوۡرَۃٍ مِّنۡ مِّثْلِہٖ ۪ وَادْعُوۡا شُہَدَآءَکُمۡ مِّنۡ دُوۡنِ اللہِ  اِنْ کُنْتُمْ صٰدِقِیۡنَ فَاِنۡ لَّمْ تَفْعَلُوۡا وَلَنۡ تَفْعَلُوۡا فَاتَّقُوا النَّارَ الَّتِیۡ وَقُوۡدُہَا النَّاسُ وَالْحِجَارَۃُ  ۚۖ اُعِدَّتْ لِلْکٰفِرِیۡنَ ۔

(Aye logo!) Agar tumhe (Quran ke Allah Ta’ala ki kitaab hone) mein shak hai jo ham ne apne bande (Muhammad Sallallaho alaihe wasallam) par utaara.(To tum mein bade bade zubaan ke maahir log hain.Tumhe apni arbi zubaan par fakhr bhi hai aur ye Quran bhi tumhari zubaan arbi mein hai to tum sab mil kar is ke jaisi puri kitaab chhod do.Is ki lambi surato ko bhi chhod do) is ke kisi ek chhoti se chhoti surah ke jaisi hi bana kar laao.Aur tum Allah ke elawah apne saare madad karne walo ko bhi bulalo,agar tum sachche ho.Phir bhi na bana sako (Aur suno ham pehle hi bata dete hain ki agar puri dunya ke log ek saath mil kar dunya ke khatam hone ke din tak bhi koshish karein tab bhi nahi bana sakenge to tum ab yaqeen kar lo ki ye kisi insaan ka nahi balki insaano ke paida karne wale khuda ka kalaam hai.kyunki khuda aur insaano ki banayi hui chiz mein yahi farq hai ki insaan ki banayi hui chizo ki tarah dusra insaan bana sakta hai.Magar khuda ki banayi hui chizo ki tarah koi nahi bana sakta.Jaise Train,Hawa’ee jahaz,Mobile aur Computer wagairah ye sab insaano ki banayi hui chizen hain.Isi liye is ko pehle kisi insaan ne banaya phir is ki tarah hazaaro log bana rahe hain aur banate rahenge.Magar Aasmaan,Zameen,Chaand,Suraj,Chiti,Machhchhar,Makkhi aur jugnu wagairah ye sab khuda ki banayi hui chizen hain.Is liye insaan chaahe jitni bhi koshish kar le khuda ki banayi hui chhoti se chhoti chiz ki tarah koi chiz nahi bana sakta.Yahan tak ki khuda ki banayi hui ek chiti ki tarah chiti bhi nahi bana sakta.)To tum daro us aag se jis ka indhan aadmi aur path-thar hai, jise na maan ne walo ke liye tayyar kiya gaya hai.(Surah baqra,Aayat No.23-24)

Quran majid ke is challenge ke baad Islam ki mukhalifat karne walo ne badi koshish kiya ki kisi tarah Quran ki kisi surat ki tarah ek surat ban jaae taaki ham Islam ko jhutla sake aur dunya ko bata sake ki ye dunya aur har chiz ko paida karne wale ki kitaab nahi hai.Magar us waqt se le kar aaj tak 1400 saal se zyada waqt guzar gaya magar kisi ne us ke jaisi ek surat to door ki baat ek jumla(Sentence) bhi nahi bana saka.Aur aaj bhi Quran ka na maan ne walo se ye challenge hai ki.Raat din Islam ki mukhalifat mein apni jaan ko ghulaane walo!Islam ko mitaane ki koshish karne walo!Apni mehnat ki laakho karoro rupiye Islam ki mukhalifat mein belawajah kharch karne walo!Islam ko jhutlaana bahut aasaan hai.Bas sab mil kar Quran ki tarah ek surat tayyar kar ke dunya ke saamne pesh kar do.Islam jhoota ho jaaega.Bana nahi sakte to kam se kam us mein koi change hi kar ke dikh laa do.Magar puri dunya is khule challenge ke saamne be bas hain.Ye is baat ki khuli hui dalil hai ki “Quran” Allah Ta’ala hi ka kalaam hai.Jis ki tarah bana na mumkin hi nahi hai.Aur jo log ab bhi inkaar kare to woh aisa kar ke dikha de.Phir hame koi inkaar nahi rahega.