Hazrat-e-Talha bin Ubaidullah radhi allaho anho.

Naam aur Nasab:Aap ka naam aur nasab ye hai.Talha,bin Ubaidullah,bin Usman,bin Umar,bin Ka’ab bin Lui,bin Galib,bin Fahar,bin Malik,bin Nazar,bin Kanana.

Aap ki walida ka naam Sa’aba bint-e-Abdullah bin Malik hazrami hai.(Asadul Gaba,Vol:2,Page No.43)

Qabool-e-Islam:Hazrat-e-Talha radhi allaho anho apne Islam laane ka waqiya khud is tarah se bayan kiya.Woh kehte hain ki:Main Busra shahar mein tijaarat ke liye gaya huwa tha.Wahan khaanqah mein ek Isa’ee Raahib raha karta tha.Us ne apne logo se kaha ki.Ye maloom karo ki baahar se aane wale taajiro mein koi Makka ka rehne wala bhi aaya hai nahi? Log maloom kar rahe the to main ne kaha ki “Main Makka ka rehne wala hun” To woh log mujhe apne Raahib ke paas le gaye.Us ne mujh se puchha ki “Ahmad” naam ka koi shakhs tum mein zaahir huwa hai? Main ne kaha kaun Ahmad? Us ne kaha.Ahmad bin Abdullah bin Abdul Muttalib.Ye mahina us ke zaahir hone ka mahina hai.Woh aakheri nabi hain.Un ke zaahir hone ki jagah Makka hai aur hijrat-gaah khajuroon wali zameen hai.Us ne mujh se kaha.Khabar-daar! Un par imaan laane mein koi tum se aage na badh jaae.Hazrat-e-Talha kehte hain ki:Us Raahib ki baat mere dil mein baith gayi main jaldi se Makka lauta,Main ne jab maloom kiya to mujhe bataya gaya ki Muhammad bin Abdullah ne nabiwat ka dawa kiya hai.Aur hazrat-e-Abu bakar un par imaan laa chuke hain.Main Hazrat-e-Abu bakar ke paas gaya to unho ne mujhe Islam ke baare mein bataya phir mujhe woh Huzur ke paas le kar gaye to main ne Huzur ke haath par Islam qabool kar liya.Aur Raahib wala waqiya Huzur se bataya To Huzur ne khushi ka izhaar farmaya.(Al-Mustadrak,Hadis No.5586)

Qabool-e-Islam ki wajah se Mushkilaat ka saamna:Jab aap ne Islam qabool kiya aur iski khabar Naufal bin adwiya ko mili jo qabila Quraish ke sher ke naam se mash’hoor tha.To woh gusse se beqaabu ho gaya.Aur us ne Hazrat-e-Abu bakar aur hazrat-e-Talha ko ek rassi mein kas kar baandh diya.Dono hazraat taklif se karaahte rahe lekin Ibn-e-Adwiya ke darr se un ke qabile ka kisi shakhs ki himmat nahi hui ki un ko jaa kar khol de.(Al-Mustadrak,Hadis No.5586)

Huzur Sallallaho alaihe wasallam aksar ye dua farmaya karte the.Aye Allah! Adwiya ke bete ki shararat se hame bacha.Is ke elawah musalmano ko zulm ke jis toofan se guzarna pada us mein shuru se aakhir tak aap har jagah saabit qadam rahe.

Huzur par mar mitne ka jazba:Hazrat-e-Talha radhi allaho anho ne huzur par mar mitne ka jo jazba pesh kiya woh qaabil-e-rashk hai.Aap har jung mein huzur Sallallaho alaihe wasallam ke saath haazir rahe.Junge Uhad mein aap ne khud ko Huzur Sallallaho alaihe wasallam ko dhal bana liya aur Aap Sallallaho alaihe wasallam ki taraf aane wali teero ko apne haath se rokte rahe yahan tak ki aap ka haath bekaar ho gaya.Aap ke sar par bhi badi sakht chot lagi hui thi us ke baad bhi aap ne Huzur Sallallaho alaihe wasallam ko utha kar ek chattan par le gaye.Us din Huzur ne Hazrat-e-Talha ke liye farmaya ki Aye Talha tum :Talhatul Khair” Yani bhala’ee ki sakhawat karne wale ho.(Asadul gaba,Vol:2,Page No.43-44)

Fazail-o-Manaqib: (1) Hazrat-e-Zubair radhi allaho anho bayan karte hain ki:Jab jang-e-uhad ke din Hazrat-e-Talha Aap Sallallaho alaihe wasallam ko utha kar chattan par le gaye to Huzur ne farmaya ki:Talha ne jannat ko wajib kar liya.(Tirmizi,Hadis No.3738.Al-Mustadrak,Hadis No.5062)

(2) Hazrat-e-Ali radhi allaho anho bayan karte hain ki Aap Sallallaho alaihe wasallam ne farmaya ki:Talha aur Zubair jannat mein mere padosi hain.(Tirmizi,Hadis No.3741)

(3) Hazrat-e-Jaabir radhi allaho anho bayan karte hain ki Huzur Sallallaho alaihe wasallam ne farmaya ki:Jo shakhs zamin par kisi shaheed ko chalte hue dekhna chaahta hai to woh Talha bin Ubaidullah ko dekh le.(Tirmizi,Hadis No.3739)

Shahadat:Jang-e-Jamal mein Marwan ne aap ko teer maara aur aap huzur sallallaho alaihe wasallam ke batane ke mutabiq shaheed ho gaye.Imam Sha’abi kehte hain ki:Shahadat ke baad jab Hazrat-e-Ali radhi allaho anho ne aap ko dekha to maare gam ke mitti apne chehre par daalne lage aur rote rote hichkiya bandh gayi.Aap ne farmaya.Aye kaash!Aaj se 10 saal pehle hi main inteqaal kar gaya hota.

Jamadil ukhra 36 hijri mein jang-e-jamal ka waqiya pesh aaya us waqt aap ki umar 62 saal kit hi.61 aur 64 saal ki bhi riwayat hai.(Asadul gaba,Vol:2,Page No.44)

Shahadat ke baad ka ek azib waqiya: Ali bin zaid bayan karte hain ki:Ek shakhs ne ek zamaane ke baad khaab dekha ki hazrat-e-Talha bin ubaidullah keh rahe hain ki:Meri qabar dusri jagah kar do.Kyunki yahan par paani mujhe taklif pahucha raha hai.Us ne lagaataar 3 raat ko ye khaab dekha.Phir woh Hazrat-e-Abdullah bin Abbas radhi allaho anho ke paas gaya aur apna khaab bayan kiya.To unho ne qabar khuda to dekha ki qabar mein paani pahuchne ki wajah se zameen mein kaa’i jam gayi hai.Unhone hazrat-e-Talha ko dusri jagah muntaqil kar diya.Jab aap ki laash-e-Mubarak ko nikala gaya to bilkul salamat tha aur aap ki aankho ke darmiya kaafur bilkul usi tarah rakha huwa tha.Allahu akbar!(Asadul gaba,Vol:2,Page No.45)