Islam par etaraz karne wale log.

Islam aur islami qanoon par eteraaz karne wale logo ka tajziya (Analysis) karne se maloom hota hai ki ye 3 tarah ke log hain.

(1)Pehle to woh log hain jin ko khoob achhchhi tarah se maloom hai ki Islam hi haq aur sach mazhab hai.Aur us ke usool aur qanoon hi ko laago karne mein puri dunya ki bhala’ee aur kaamyabi hai.Us ke qanoon ke elawah dunya mein koi aisa qanoon nahi hai jis par chal kar puri dunya ko aman aur sukoon ka gahwara banaya jaa sakta hai. Magar ye log Hasad jalan aur tang nazri ki bimaari mein mubtala hain . Aur ye sochte hain ki agar Islam ko maan liya jaae to phir hamari dunyawi sardari aur hukumat khatam ho jaaegi.Aur saath hi ham apni marzi ke mutabiq ayyashi bhi nahi kar paaenge.Is liye ye log apni jhooti shaan ko baaqi rakhne aur apne zaati faa’ide ko haasil karne ki garaz se Islam par tarah tarah ke eteraaz kar ke apne logo ke dilo mein Islam se nafrat paida karte rehte hain.Aise logo ke saamne Islam ke haq hone par laakho dalil diya jaae.Woh kabhi nahi maanege.Is liye ki dalil ke sahi hone ke waqt woh shakhs maan jaata hai jo maan ne ka irada rakhta ho.Aise logo ke liye sirf dua ki jaa sakti hai.Is ke elawah kuchh nahi kiya jaa sakta.

(2) Dusre woh log hain jinho ne Islam ka sar sari taur se muta’ala (Study) kiya hai.Aur Islami ahkaam-o-Masa’il ki hikmato aur wajuhaat ko nahi jaante.Is liye un ke dimaag mein bahut saare eteraz aate hain.Jab ki agar woh khud un masa’il ki tafseel padhe aur us ki hikmato par gaur-o-fikr kare to un ke eteraaz ka hal unhein khud mil jaaega.Aur aqalmando ka tariqa bhi yahi hai ki jab koi baat unhein samajh mein nahi aaye to us ki tafseel jaan ne ki koshish kare.Ya jaan ne wale se puchhe.Na ye ki woh begair jaane hue maidan mein kood jaae aur adhuri maloomat rakh kar faisala suna ne lage.Kyunki aisa karne se sharmindagi ke elawah kuchh haasil nahi hota.Zaahir si baat hai ki ek shakhs ne ek khoobsurat maasum chehre wale ladke ke jism par kore baraste hue dekha to ye maloom karne ke bajaae ki us ka jurm kya hai? Us ke saath aisa sulook kyun kiya jaa raha hai.us ki himayat mein kood jaae aur maarne wale ko zaalim kehne lage.Jab ki haqiqat mein woh khud zaalim ka saath de raha hai.To aise logo ko sharmindagi ke elawah aur kya haasil hoga? Bahut saare log is bimaari mein mubtala hain.Aise hi logo ko haqiqat-e-haal bataane ki niyat se yahan par Islam ke khilaaf kuchh eteraz aur un ke jawab pesh kiye jaaenge.

(3)Tisre woh log hain jin hone khud se Islam ke baare mein kuchh bhi nahi padha hai.Balki woh Islam ke dushman jo T.V wagairah par Islam ke khilaaf apne mann ke mutabiq Islam ka naqsha pesh karte hain.usi se Islam ke baare mein jaante hain.Aur samajhte hain ki Yahi Islam hai jo ye log dikha rahe hain.Ya Islam ke baare mein padha bhi hai.To woh kitaabein padha hai jise Islam ke dushmano ne Islam ke khilaaf likha hai.Aur us mein apne mann ke mutabiq Islam ko pesh kiya hai.Aur in logo ne usi ko bhul se Islam samajh liya hai.Aise tamam logo ka ham welcome karte hain aur unhein Islam ki mu’atabar kitaabein (authentic books) padhne ki dawat dete hain ki woh aage badhe aur haqiqat ki raushni mein Islam ke khoobsurat chehre ko dekhe.Mujhe yaqin hai ki woh sahi Islam ko jaan ne ke baad apne aap ko us ke qabool karne se rok nahi paaenge.