KUFRIYA JUMLO KE BAARE MEIN ZARURI MALOOMAT

ZUBAAN KI HIFAZAT: Hazrat-e-Abu-hurairah radhi allaho anho bayan karte hain ki:Nabi kareem sallallaho alaihe wa-sallam se puchha gaya ki: ya Rasollallah صلی اللہ علیہ وسلم zyadah tar log kis wajah se jannat me jaayenge?Aap sallallaho alaihe wa-sallam ne farmaya:parhezgari aur achchhe akhlaq ki wajah se.Rawi bayan karte hain ki phir Aap sallallaho alaihe wa-sallam se puchha gaya ki aur zyadah tar log kis wajah se jahannam me jaayenge? Toh Aap sallallaho alaihe wa-sallam ne farmaya:zaban aur sharam-gaah ki wajah se.(Al-Mustadrak lil-hakim,hadith NO.7919)

Aaj bahut saare log apni zabaan ki hifazat nahi karte aur jo muh me aata hai bolte rehte hai hadd toh ye hai ki kabhi kabhi bahut saari aisi bhi baatein bol dete hain jo Quran o hadis aur islami aqeede ke khilaaf hota hai aur jiske bolne se admi islam se nikal jaata hai.Magar ilm na hone ki wajah se unhein kuch ehsas bhi nahi hota.

Nabi kareem sallallaho alaihe wa-sallam ne irshad farmaya ki:banda Allah taala ki khush-nudi ki baat bolta hai aur us ki taraf tawajjoh bhi nahi karta yaani ye khayal bhi nahi karta ki Allah taala is baat se itna zyadah khush hoga magar Allah taala uski wajah se us ka darja bahut baland kar deta hai.Aur banda Allah taala ki naa-khushi ki baat bolta hai aur  uski taraf dhiyan nahi karta yaani uske zehan mein ye baat nahi hoti ki is ki wajah se Allah taala itna zyadah naa-raaz hoga,magar usi ki wajah se woh jahannam mein jaa`ega .Aur dusri riwayat me hai ki woh usi baat ki wajah se jahannam ki itni gehraai mein  girega jo poorab aur pachhim ke faasle se bhi zyadah hai.(Sahi Bukhari,hadith No.6478.Muslim,H:2988)

Is liye ab ham kuchh aisi baatein likhte hain jiska bolna sahi nahi, taake hamare islami bhai un jumlon ko bolne se parhez Karen.Allah taala ham sab ko sahi tariqah apna-ne ki taufiq ata farmae.

ALLAH TAALA KE BAARE ME BOLE JAANE WALE KUCHH GALAT JUMLE AUR UN KA HUKM:

  • Kuchh bimarion aur musibaton se pareshaan log is tarah se bol dete hain ki:”NA JAANE MERA BULAWA KAB AAYEGA?SHAYAD BANA-NE WALA MUJHE BHUL GAYA HAI.”Ye jumla aur is tarah ke woh tamaam jumle jis me bhulne ki baat Allah taala ke liye kahi jaae kufr hai.yani is tarah ke jumle bolne se insan kafir hojata hai.kyunki Quran paak me hai:

Allah taala bhulta nahi woh kisi baat ke bhulne se paak hai.(Surah Taha,Aayat:152)

  • Agar koi Aadmi is tarah se bolta hai ki:”Allah taala ke ghar ka toh saara nizam hi ulta hai jo jitna zyada neki karta hai Allah taala usko utna hi zyada musibat deta hai” isi tarah kisi ne kisi ko  mashwara diya ki:bhai sabar karo aur apna mamla Allah taala par chhod do, usne jawab me kaha:” yaar! Maine Allah taala par chhod kar dekh liya hai kchh nahi hota”ya is tarah kaha ki:”Allah taala bhi zalimon hi ka sath deta hai.” Toh in sab jumlo ko bolne wala kafir ho jata hai.kyunki ye Allah taala ki shaan me tauheen aur be-adbi hai.
  • Kisi shakhs ki aqalmandi aur hushyaari ko bayan karte hue kaha ki:Woh toh itna chalak hai ki: Allah taala ko bhi thhag leta hai.Toh kafir hojaayega.kyunki ye aqida rakhna ki koi shakhs Allah taala ko bhi dhoka de sakta hai ya thhag sakta hai Quran o hadis ke khelaaf hai.
  • Pyaar aisa hai ki khuda bhi hai-raan hai.Rab ruthta hai toh ruthe,mera mahboob mujh se na ruthe. Fulan ladka itna bad-maash hai ki Allah bhi is se pareshaan hai.Tum ko paida karke Allah bhi pachhta raha hai. Ye sab jumle kufriya hain.aam taur se aise jumle filmi gaano aur dialogue mein istemaal kiye jaate hain aur log use shauq se sunte rehte hain aur khud bhi gaate hain.Allah taala ham sab ko aisi behuda baatein bolne se mahfooz rakhe.
  • Khuda se chheen laa’onga.chhodo yaar!Khuda se ham khud nipat lenge.Agar Allah taala mujhe fulan admi ke saath jannat me jaane ka hukm dega toh main nahi jaa’onga.Agar Allah taala ne falan admi ke begair mujhe jannat diya toh main nahi jaa’onga.ye sab jumle bhi kufriya hain.aur bolne walon ka anjaam jahannam hai.
  • Do admi mein ladai hui toh ek tisre admi ne samjhaate hue kaha ki jhagda bandh karo aur aapas me dono mil jaao.is par jhagda karne wale ne kaha ki:Agar khuda bhi kahe toh main nahi milunga.ya kisi se is tarah kaha ki:Tum ko mere hatho se khuda bhi nahi bacha pa-ega.ya is tarah kaha ki : yahan khuda ka nahi sirf mera hukm chalta hai. In sab jumlon ko bolne wala kafir ho jaaega.
  • Kisi ne parishani mein Allah taala ki shikayat karte hue kaha ki:Allah taala ne mujhe ab tak gam aur musibat ke siwa aur diya hi kya hai?khud toh aasaman pe baitha hukumat kar raha hai aur saari musibaten mere ghar mein daal rakha hai,mujhe toh aaj tak koi khushi diya hi nahi. Ya jumala kufr ka hai.kyunki is jumle me Allah taal ki shaan mein tauheen hai aur ye bhi ki uske liye makaan bola gaya jab ki wo kisi makaan mein hone se paak hai.
  • Kisi ne Allah taala ko “upar wala” kaha, toh agar ye maan kar kaha ki Allah tala upar hai toh kafir ho jaaega kyunki Allah ta’ala makaan se paak hai.Aur agar upar wala kaha aur us se uska maqsad Allah taala ki balandi aur azmat bayan karna chaahta ho tab kaafir toh na hoga magar phir bhi galat Qarar diya jaaega aur use mana kiya jaaega.kyunki is jumle se Allah ke liye makaan mein hona samajh mein aata hai.
  • “Allah paak ke liye “miyan” ka lafaz bolna mana hai.kyunki is lafz ke 3 mane hote hain.(1)Aaqa. (2)Shauhar.(3)Zina ka dalal. Yaad rakhe har woh lafz jis ke kai maane hon aur unme se koi bhi mana Allah taala ke shaan ke khelaaf ho toh us lafz ka Allah taala ke liye bolna naajiz hota hai. Agarche woh sahi mana hi ki niyat se bole.
  • Raam aur Rahim ek hain. Ye kehna kufar hai.kyunki rama ka mana hota hai ek cheez ka dusre mein daakhil hojana aur hindu log us ko RAM is liye kehte hain ki woh saari chizon me us ko hulol kiya huwa(yani ghusa huwa) maante hai.jab ki ALLAH taala is se paak hai.

SHARI’AT KE BAARE ME BOLE JANE WALE GALAT ALFAZ

  1. Mujhe shari’at pe amal kar-ke bhuke nahi marna hai.
  2. Shari’at gai bhaad me kya har waqt shari’at shari’at karte rehte ho.
  • Shari’at to maulvio ki garhi hui batein hain aur kya hai.
  1. Ham shari’at nahi apna rasm-o-rewaj dekhyenge.
  2. Shari’at pe amal karte hue roza woh rakhe jis ke paas khana na ho.
  3. Zakat,ye to ek zulm hai yaar!

Ye sab jumle kufrya hain kyunki is mein shari’at ki tauheen aur inkaar hai.

FARISHTON KE BAARE ME BOLE JAANE WALE KUFRIYA KALEMAT

  • Farishte koi cheez nahi
  • Jibra’il bhul gaye jaana tha ALI ke paas aur chale gaye MOHAMMAD(sallallaho alaihe wasallam) ke paas.
  • Malakul maut se galti hui. 100 saal ke budhe ko chhod diya aur 2 saal ke bach-che ko legaya.
  • Malakul maut bada zaalim hai,bechari ke paas ek hi beta tha use bhi na chhoda.
  • Allah taala ko khabar nahi aur farishte rooh nikal ne agaye.

Ye sab kufriya jumle hain.Allah taala farishton ke bare me irshaad farmata hai:woh apne upar apne rab ka khauf karte hain aur sirf wahi kaam karte hain jis ka unhein hukm diya jata hai.{surah al-nahal,Aayat :05)                                                                                                                                                 Is liye farishton ko na man’na ya unhein galat tharana ya un ki shaan me be-adbi karna ye haqiqat me Quran-o-hadis ko na maan’na hai.

MAZAQ MEIN BOLE JAANE WALE KUFRYA KALEMAT

  • Achcha hai jahannam mein jaayenge ,are filmi hero aur heroine bhi to wahi rahenge na !!!
  • Are agar tum log jannat me chale bhi gaye toh cigarette jalaane hamare paas jahannam mein aana padega.
  • Aaj namaz ki chutti hai.
  • Aaj sab maaf hai.(aam taur se log ye jumla khushi ke mauqe pe gunah ke kaam pe tokne par bolte hain.)

Is ke elawah aur bhi bahut saare jumle log mazaq mein bolte hain aur jab un ko toka jaata hai to kehte hain ki:ham ne to mazaq mein aisa kaha,is liye ham to kafir hue hi nahi to ham tauba kyun Karein aur kalma kyun padhe? Wagairah.

Allah taala irshad farmata hai.” Aye mahboob ! Agar Aap un se puchho tu kahenge ki ham to aise hi hansi khel mein the.Aap kahiye.Kya Allah aur us ki aayaton aur us ke Rasool se hanste ho.bahaa’ne na banao tum kaafir ho chuke imaan lane ke baad.{Surah Tauba:Aayat,No:65-66}

Aur tum mein se jo koi apne deen se phire ,phir kaafir ho kar mare,tu unke aamal bar’baad hue,dunya aur akhirat me.Aur woh dozakh wale hain.unhein us mein hamesha rehna hai.                       {Surah baqra:Aayat,No:217}

Jo aag se bacha kar jannat mein dakhil kiya gaya tu woh kamyab huwa,Aur dunya ki zindagi tu bas dhoke ka maal hai.{Surah baqra:Aayat,No:185}

Allah taala ham sab ko apni zaban ki hifazat karne ki taufeeq ata farmaye.

Ameen bajahe saiyedul-mursaleen.

Jab tak tum do chizon ko mazbuti se pakde rahoge kabhi gumrah nahi hoge 1:Quran 2:Apne nabi ki sunnat.(Hadith)

Allah us shakhs ko khush rakhe jis ne meri hadees sun kar use yaad rakha aur phir use aage pahuncha diya(Hadith)

Beshak tumhare liye Rasool ki zindagi me behtareen namuna hai.(Quran)

Allah jis ke saath bhalaai ka iraada farmata hai use deen ki samajh nasib farma deta hai.(Hadith)

Deen ka ek mas'ala sikhna 100 rik'at nafil padhne se behtar hai.(Hadith)

Nek aurat dunya ki sab se behtareen chiz hai.(Hadith)

Qasam hai Qalam ki! Aur uski jo woh likhta hai.(Quran)

Haj aur umrah ko pura karo sirf Allah ke liye.Kyunki Allah Ta'ala Dekhawe ki ibaadat ko qabool nahi farmata hai