Malik aur Seerat-e-Mustafa ﷺ.

Ek achhchha malik hone ki haisiyat se hamara apne khidmat karne wale aur naukaro ke saath kaisa sulook hona chahiye?Is baare mein Nabi kareem ﷺ ki seerat puri dunya ke liye sab se behtarin namuna hai.
Aap ﷺ ka apne khaadimo ke saath sulook:Hazrat-e-Anas radhi allaho anho bayan karte hain ki:Main 10 saal tak Aap ﷺ ki khidmat mein raha.Allah ki Qasam!Aap ne kabhi mujhe uff tak nahi kaha.Aur nahi kabhi ye kaha ki tum ne falan kaam kyun nahi kiya ya falan kaam kyun kiya?(Sahi Muslim,Hadis No.2309)
Hazrat-e-Aaisha radhi allaho anha bayan karti hain ki:Huzur ﷺ ne jehaad ke elawah kabhi kisi ko apne haath se nahi maara,Nahi kisi naukar ko maara aur nahi kisi aurat ko.(Shamaail-e-Tirmizi,Page No.596)
Huzur ﷺ apne gulamo aur khaadimo ke saath kaisi muhabbat aur shafqat farmate the.Us ka andaaza hazrate Zaid ke waqiye se lagaaya jaa sakta hai ki Hazrat-e-Zaid bachpane hi mein apne maa baap se bichhad gaye aur gulam ki surat mein Huzur ke darbaar tak pahuche.Ek zamaane tak un ke maa baap apne bete Zaid ki judaai mein rote rahe aur un ko talaash karte rahe.Aakhir mein jab un ko maloom hua ki un ka beta Zaid Makka mein hai.To apne bete ko wapas laane ke liye udd kar Makka pahuche aur huzur se kaha ki aap jitna bhi rupiya paisa lena chaahte hain le lijiye aur hame hamara beta de dijiye.To Aap ﷺ ne farmaya ki Mujhe rupiyo ki zarurat nahi. Haan!Main ye chaahta hun ki Zaid ko ekhtiyar do agar woh aap ke saath jaana chaahe to hame koi eteraaz nahi aur agar woh hamaare saath rehna chaahe to us par zabar dasti nahi karna.Phir Hazrat-e-Zaid ko ekhtiyar diya gaya ki agar chaaho to apne walid ke saath apne ghar chale jaao aur chaaho to yahi raho.To un hone begair kisi jhijhak ke kaha:Ya Rasoolallah ﷺ !Main aap ko chhod kar aur kahein jaane ke liye soch bhi nahi sakta.Aap hi mere baap hai aur aap hi mere chacha hain.Is par un ke walid ne kaha Aye Zaid!Tum par afsos hai.Tum azaadi ke bajaae gulami ko aur apne maa baap ke saath rehne ke bajaae in ke saath rehna pasan karte ho.Tumhein kya ho gaya hai. To Hazrat-e-Zaid ne farmaya:Aye mere baap!Dunya mein in se zyada muhabbat aur pyaar dene wala koi nahi.Main inhe chhod kar kahin aur jaane ke baare mein soch bhi nahi sakta.(Ziyaun Nabi,Vol:2,Page No.158-159)
Gulamo,Naukaro aur mazduro ke baare mein Aap ﷺ ki hidayat:Jis tarah Aap ﷺ ne khud apne gulamo aur khadimo ko saath achhchha sulook kiya usi tarah apni ummat ko bhi is ki hidayat farmaya.
(1)Aap ﷺ ne farmaya ki:Tumhari khidmat karne wale tumhare bhai hain.Jinhe Allah Ta’ala ne tumhare niche kar diya hai.To har woh shakhs jis ke niche us ka bhai ho use wahi khilaae jo khud khaata hai aur use waisa hi pehnaae jaisa khud pehanta hai.Aur us par kaamo ka itna zyada bojh nahi daale ki woh nahi kar sake aur agar daale to us ke kaam mein madad kare.(Tirmizi,Hadis No.1945)
(2) Hazrat-e-Abdullah bin Umar radhi allaho anhuma bayan karte hain ki:Ek shakhs Huzur ﷺ ke paas aaya aur arz kiya:Ya Rasoolallah ﷺ ! Main apne khaadim ko kitni baar maaf karun? To Aap ﷺ khamush rahe.Phir unhone kaha: Ya Rasoolallah ﷺ ! Main apne khaadim ko kitni baar maaf karun? To Aap ﷺ ne farmaya ki:Har din 70 baar.(Tirmizi,Hadis No.1949)
(3)Hazrat-e-Abu Bakar radhi allaho anho bayan karte hain ki:Huzur ﷺ ne irshad farmaya ki:Bad kirdaar maalik jannat mein nahi jaaega.(Tirmizi,Hadis No.1946)
(4) Hazrat-e-Abdullah bin Umar radhi allaho anhuma bayan karte hain ki: Huzur ﷺ ne irshad farmaya ki:Mazduro ko pasina sukhne se pehle uski mazduri de do.(Ibn-e-Maajah,Hadis No.2443)
(5)Hazrat-e-Abu Hurairah radhi allaho anho bayan karte hain ki:Huzur ﷺ ne irshad farmaya ki:3 tarah ke logo ke khilaaf qayamat ke din main khud ladunga.Ek to woh shakhs jis ne mera naam le kar kisi ko kisi baat ka yaqin dilaaya aur jab us ne mere naam ki wajah se yaqin kar liya to us ne dhoka de diya.Dusra woh shakhs jis ne kisi azaad admi ko bech kar us ki qimat khaa liya.Tisra woh shakhs jis ne kisi ko mazduri par rakha,Phir kaam to pura liya lekin uski mazduri nahi diya.(Sahi Bukhari,Hadis No.2270.Ibne Maajah,Hadis No.2442)