Sone ka tariqa

Sone ka sunnat tariqa ye hai ki pehle kuchh der daheni karwat par daheni rukhsaar ke niche apna dahina haath rakh kar soye.Phir baa’e karwat par soye.[Shama’ile Tirmizi,Hadith No.238]
Mas’ala:Pet ke bal letna aur sona mana hai.Ek shakhs ko Huzur sallallaho alaihe wasallam ne pet ke bal lete hue dekha to mana kiya aur irshad farmaya ki:Ye jahannamiyon ke letne ka tariqa hai.Yani jahannamiyon ko jahannam mein isi tarah letaya jaayega.[Ibn-e-Majah,Hadith No.3724]
Mas’ala:Chit letne ki haalat mein ek pair ko khada kar ke dusre pair ko us par rakhna mana hai jab ki woh tehband ya koi aisa kapda pehna ho jis mein satar ke khulne ka dar ho.(Muslim,Hadis No.2099)
Mas’ala:Begair rok wali chhat par sona mana hai.
Mas’ala:Asar ke baad aur isha ki namaz padhne se pehle sona makruh hai.Hazrat-e-Aaisha radhi allaho anha se riwayat hain ki agar koi shakhs asar ke baad soe aur uski aqal jaati rahe to woh apne aap hi par malamat kare.(Abu Dawood,Hadis No.4849)
Mas’ala:Behtar ye hai ke sote waqt agar wazu na ho to wazu kar le aur kalma,Istigfaar,Quran sharif ki kuchh suratein aur darood-e-paak wagairah padh kar soye kyunki jis haalat par insaan sota hai usi haalat par uthta hai aur jis haalat par marta hai qayamat ke din usi haalat par uthaya jaayega.
Hadis: Huzur Sallallaho alaihe wasallam ne farmaya ki Jo shakhs wazu kar ke sota hai.Phir raat mein jaag kar Allah Ta’ala se dunya aur aakherat ki jo bhi bhala’ee maangta hai.Allah Ta’ala use ata farmata hai.(Abu Dawood,Hadis No.5042)