سُوال: اِحرام کی حالت میں بیوی کو ہاتھ لگانا کیسا؟
جواب: بیوی کو بِلا شَہْوَت ہاتھ لگاناجائز ہے مگر شَہْوَت کے ساتھ ہاتھ میں ہاتھ ڈالنا یا بدن کوچُھونا حرام ہے۔اگر شَہْوَت کی حالت میں بَوس وکَنار کیا یاجِسم کوچُھوا تو دَم واجِب ہوجائے گا۔یہ اَفعال عورت کے ساتھ ہوں یا اَمْرَد کے ساتھ دونوں کا ایک ہی حکم ہے۔ (دُرِّمُختارو رَدُّالْمُحتار ، ج ۳ ، ص ۶۶۷) اگر مُحرِمہ کوبھی مرد کے اِن اَفعال سے لذَّت آئے تو اُسے بھی دَم دیناپڑے گا۔ (بہارِ شریعت ، ج۱ ، ص ۱۱۷۳ )
سُوال: اگر تصَوُّر جم جائے یاشَرْمگاہ پر نظر پڑجائے اور اِنزال ہو (یعنی منی نکل ) جائے تو کیا کَفّارہ ہے؟
جواب: اِس صورت میں کوئی کَفّارہ نہیں ۔ (عالمگیری ، ج۱ ، ص۲۴۴) رہاحرام کردہ عورَت یا اَمْرَدسے بد نِگاہی کرنایاقصداً اُن کا ’’ گندا ‘‘ تصَوُّر باندھنا یہ اِحْرام کے علاوہ بھی حرام اورجہنَّم میں لے جانے والا کام ہے۔نیز اس طرح کے گندے وَسوَسے بھی آئیں تومَعَاذَاللہ لطف اندو ز ہونے کے بجائے فوراً توجُّہ ہٹائے۔ اِسی طرح عورَتوں کیلئے بھی یِہی اَحکام ہیں ۔
سُوال: اگر اِحتِلام ہوجائے تو؟
جواب: کوئی کَفّارہ نہیں ۔ (عالمگیری ، ج۱ ، ص۲۴۴)
ِسُوال: اگر خُدا نخواستہ کوئی مُحرِم مُشت زَنی (ہینڈ پریکٹس ) کا مُرتکِب ہُوا تو کیا کَفّارہ ہے؟
جواب: اگر اِنزال ہوگیا (یعنی منی نکل گئی) تو دَم واجِب ہے ورنہ مکرُوہ۔ (ایضاً) یہ فعل ، خواہ اِحرام ہو یا نہ ہوبَہَرحال ناجائز وحرام اور جہنَّم میں لے جانے والا کام ہے۔اعلیٰ حضرت امام احمد رضا خانعَلَیْہِ رَحْمَۃُ الرَّحْمٰن فرماتے ہیں : جو مُشْت زَنی (یعنی ہینڈ پریکٹسHand practic ) کرتے ہیں اگر وہ بِغیر توبہ کئے مر گئے تو بروزِ قِیامت اِس حال میں اُٹھیں گے کہ ان کی ہتھیلیاں گابَھن (یعنی حامِلہ) ہوں گی جس سے لوگوں کے مجمعِ کثیر میں ان کی رُسوائی ہوگی۔ (مُلَخَّص ازفتاویٰ رضویہ ، ج۲۲ ، ص۲۴۴)
سُوال: اگر اَمْرَد (یعنی خوبصورت لڑکے) سے مُصَافَحہ کیا اور شَہْوَت آگئی تو کیا سزا ہے ؟
جواب: دَم واجِب ہوگیا۔ اس میں اَمْرَد اور غیرِ اَمْرَد کی کوئی قید نہیں ، اگر دونوں کو شَہْوَت ہوئی اور دوسرا بھی مُحرِم ہے تو وہ بھی دَم دے۔
سُوال: اِحرام میں میاں بیوی کے ایک دوسرے کاہاتھ پکڑ کر طواف یا سَعْی کرنے میں اگر شَہْوَت آ گئی تو؟
جواب: جس کو شَہْوَت آئی اُس پر دم واجِب ہے اگر دونوں کو آگئی تو دونوں پر ہے ۔ اگر اِحْرام والے مردوں نے ایک دوسرے کاہاتھ پکڑا ہو جب بھی یِہی حُکم ہے۔
سُوال: کیا جِماع (یعنی ہم بستری) سے حج فاسِد بھی ہوسکتا ہے؟
جواب: وُقوفِ عَرَفات سے پہلے جماع کیا (یعنی ہم بستری کی) تو حج فاسِد ہوگیا۔ اُسے حج کی طرح پورا کرکے دَم دے اور سالِ آیَندہ ہی میں اس کی قَضا کر لے۔ (عالمگیری ، ج۱ ، ص۲۴۴) عورت بھی اِحرام حج میں تھی تو اس پر بھی یِہی لازِم ہے اور اگر اس بلا میں پھر پڑجانے کا خوف ہو تو مناسِب ہے کہ قَضا کے اِحرام سے ختم تک دونوں ایسے جدا رہیں کہ ایک دوسرے کو نہ دیکھے۔ (بہارِ شریعت ، ج۱ ، ص۱۱۷۳)
سُوال: اگر مسئلہ معلوم نہ ہو یا بھول سے جِماع (یعنی ہم بستری) کر بیٹھا پھر؟
جواب: بھُول کر یا نہ جانتے ہوئے ہم بِستری کی ہو یاجان بُوجھ کر ، اپنی مرضی سے کی ہو یا بِالجَبر سب کا ایک حکم ہے۔ بلکہ دوسری مجلس میں دوسری بار جِماع کر بیٹھا تو دوسرا دَم بھی دینا ہوگا ، ہاں تَرکِ حج کا اِرادہ کرلینے کے بعد جِماع سے دَم لازِم نہ ہوگا۔
سُوال: کیا جِماع سے حاجی کا ’’ اِحْرام ‘‘ ختم ہوجاتا ہے؟
جواب: جی نہیں ، اِحْرام بدستُور باقی ہے جو چیزیں مُحرِم کے لئے ناجائز ہیں وہ اب بھی ناجائز ہیں اور وُہی تمام اَحْکام ہیں ۔ (بہارِ شریعت ، ج۱ ، ص۱۱۷۵)
سُوال: اگر حج فاسِد ہوجائے اور اُسی وَقْت نیا اِحْرام اُسی سال کے حج کے لئے باندھ لے تو؟
جواب: اِس طرح نہ کَفّارے سے خَلاصی ہوگی نہ اب اِس سال کا حج ہوسکے گا کہ وہ تو فاسِد ہوچُکا ، بَہَر حال سالِ آیَندہ کی قَضا سے بچ نہیں سکے گا۔ (ایضاً)
سُوال: مُتَمَتِّع نے عُمرہ کر کے اِحرام کھول دیا ہے اور ابھی مَناسکِ حج شُروع ہونے میں کئی روز باقی ہیں ، بیوی کے ساتھ ’’ مِلاپ ‘‘ ہو سکتا ہے یانہیں ؟
جواب: جب تک دونوں نے حج کا اِحْرام نہیں باندھا ، ہو سکتا ہے۔
سُوال: اگر عُمرے کا اِحرام باندھنے کے بعد طَواف وغیرہ سے قَبل ہم بِستری کرلی تو کیا کَفّارہ ہے؟
جواب: عُمرے میں طَواف کے چارپَھیرے کرنے سے پہلے اگر جِماع کیا تو عُمرہ فاسِد ہوگیا ، عُمرہ پھر سے کرے اور دَم بھی دینا ہوگا ، اگر چا رپَھیرے یا مکمَّل طَواف کے بعد کیا تو صِرْف دم واجِب ہوا عُمرہ صحیح ہوگیا۔ (درمختار ، ج ۳ ، ص ۶۷۶ )
سُوال: اگر مُعتَمِر (یعنی عُمرہ کرنے والا) طَواف وسَعْی کے بعدمگر سَر منڈانے سے پہلے جِماع میں مبتَلا ہوگیاپھرتو کوئی سزا نہیں ؟
جواب: کیوں نہیں !اب بھی دَم واجِب ہوگا ، حَلْق یا قَصْر کروانے کے بعد ہی بیوی حلال ہو گی۔

متعلقہ عناوین

حج وعمرہ کی فضیلت حج کرنا کس پر فرض ہے؟ حج کی قسمیں حج کرنے کامکمل طریقہ حج کے فرائض ، واجبات اور سنتیں احرام کے مسائل عورتوں کے حج کے بارے میں سوال جواب عمرہ کرنے کا طریقہ حج کی دعائیں حج و عمرہ میں غلطیاں اور ان کے کفارے