(1)Hajj us musalman par farz hai jo Aaqil, Baaligh aur Saahibe isteta’at hai.
Saahibe isteta’at se murad woh shakhs hai jis ke paas itna maal hai ke woh Hajj ke safar ka kharch kar sake aur saath me uske ahlo ayaal aur jin ki parwarish uske zimme hai hajj ke safar se waapas aane tak unki zaroorat ke liye maal chhor sake.
(2)Musalman par Hajj sirf ek baar hi Farz hai. Is ke baad jab bhi karega ‘Nafil’ hoga.
(3)Jab Hajj ke liye jaane ki taaqat ho jaae to foran ya’ni usi saal me hajj farz ho jaata hai. aur ab der karna gunah hai. kai saal tak na kiya to faasiq hai aur uski gawahi mardood hogi.Magar jab karega ada hi hai, Qaza nahi.
(4)Jis ki ijazat lena waajib hai bagair unki ijazat Hajj ka safar makrooh hai jaise Waaledain ya Shohar, unhe raazi kar len. Agar maa-baap na ho to Daada-daadi ke liye bhi yahi hukm hai.Agar ijazat na mile tab bhi farz hajj ke liye chale jaaen.Nafil hajj ho to waaledain ki farma bardaari karen.
(5)Aurat ke saath uska Shauhar ya Maharam hona zaruri hai. Maharam use kehte hain jin se uska nikah hamesha ke liye haraam hai.
(6)Hajj ke safar ka maqsad sirf ALLAH ta’ala ki raza aur ishqe Rasool sallallahu alaihi wasallam hona chahiye, Riyakaari yani dikhawa aur fakhr nahi.
(7)Samaane safar Halaal maal se len, warna Hajj qubool hone ki ummid nahi.
(8)Agar Gusl, Wuzu, Namaaz, Roza wagairah ke sahih masail ma’aloom na ho to sikh len.
Share.........

Related Topics

Haj Aur Umrah ki Fazilat Haj Ki Qismen Haj Karne Ka Tariqa Haj Ke Faraaiz,Wajibaat Aur Sunnaten Ehraam Ke Masaail Aurato Ke Haj Ke Baare Me Sawal Jawab Umrah Karne Ka Mukammal Tariqa