Eteraz: Islam ke woh usool o qawaneen jin par mulhideen ki taraf se be-ja aitirazat kiye jate hain, un mein murtad ki saza sar-e-fehrist hai. Is ke khilaf aisa propaganda kiya jata hai jaise yeh ek intehai ghair-maqool aur na-qabil-e-fahm maamla ho, halanke aisa kuch bhi nahin hai, balki yeh ek aisi ma’qool saza hai jise duniya ka har mulk jo apna ek qanooni nizam rakhta hai use apnane par majboor hai.
Is se pehle ke hum Islam ke is qanoon "murtad ki saza qatl" ki maqooliyat aur is se mutaliq tafseelaat pesh karen, mulhideen ki taraf se is masle par pesh kiye jane wale aitiraz par ek nazar daal len.
Mulhideen ka kehna hai ke ek shakhs ko lagta hai ke Islam sahih mazhab nahin — is bunyad par woh use chhor kar doosra mazhab ikhtiyar karta hai — to Islam use qatl ki saza sunata hai. Yeh cheez insani zameer ki azadi ke khilaf hai, har insaan ko yeh haq hasil hona chahiye ke jis cheez par us ka dil mutmain ho use qubool kare aur jis cheez par us ka itminan nahin ho use qubool na kare. Yeh azadi jis tarah ek mazhab ko shuru me qubool karne ya na karne ke maamle mein har aadmi ko milni chahiye, usi tarah ek mazhab qubool karne ke baad us par qayam rehne ya na rehne ke maamle mein bhi hasil honi chahiye. Koi shakhs kisi mazhab ko qubool karne ke baad use chhorna chaahta hai — kyon? Isi liye nah ke is mazhab ke haq hone ka yaqeen jo use pehle tha ab nahin raha. Yaqeen khatam hone ke baad chhorne wale ko phansi ya qatl ki saza dena kaise sahih ho sakta hai? Aakhir jis cheez ko us ka dil qubool nahin kar raha woh us par kaise qayam reh sakta hai. Aisi surat mein qatl ki saza dene ka matlab sirf yahi hota hai ke jis shakhs ki raaye Islam daleelon se nahin badal pati use qatl ki saza se dara kar zabardasti apni raaye badalne par majboor karta hai. Aur yeh khuli na-insafi hone ke saath khud Islam ke liye bhi nuqsan-deh hai, kyunke agar sabhi mazhab ke log Islam ki tarah apne mazhab se phirne wale ki saza qatl qarar dein to jis tarah Musalman ke liye doosra mazhab qubool karna mushkil ho jaye ga, usi tarah doosre mazhab ke logon ke liye bhi Islam qubool karna mushkil ho jaye ga — is tarah tamaam mazhab ke saath khud Islam ki dawat o tabligh ka rasta bhi band ho jaega.
Jawab:Sab se pehle yeh baat samajh leni chahiye ke Islam se phirne walon ki saza qatl har jagah aur har haal mein hai ya nahin? Agar har jagah aur har haal mein nahin to phir kis jagah aur kis haal mein hai aur kis jagah, kis haal mein nahin? Aur is farq ki bunyadi wajah kya hai?
Is baat par sabhi ahl-e-Islam ka ittefaq hai ke murtad ki saza qatl sirf usi state mein ho sakti hai jis ki bunyad Islami nazriya par qayam ho aur jis mein Islam sirf ek aise mazhab ki haisiyat se na ho ke woh marne ke baad insaan ko nijaat dene wala hai balki is haisiyat se ho ke marne se pehle zindagi ki taraqqi aur khush-hali ka bhi woh zimmedar ho — ya'ni jis mulk ka Islam se alag koi apna zaati qanoon aur dastoor na ho balki Islam hi us mulk ka qanoon aur dastoor ho, aur Islam se baghawat ka matlab mulk aur us ke qanoon se baghawat ho. Is ke ilawa har woh riyaasat jo is qism ki nah ho us mein murtad ki saza qatl nahin ho sakti. Isi tarah woh shakhs jo nabaaligh ho ya pagal aur zehni bemari ka shikar ho use bhi irtidad ki surat mein qatl ki saza nahin di ja sakti. Yeh hai murtad ki saza ke mutalliq Islam ka qanoon.
Ab insaaf ke saath duniya ke tamaam mulkon ke qawaneen par nazar daaliye, chaahe woh badshahi nizam ka haamil mulk ho ya jamhoori tarz se chalne wala mulk. Har mulk aur har riyaasat apne khilaf baghawat karne wale ko phansi hi ki saza tajweez karti hai aur koi bhi mulk baghawat karne wale ko azadi faraham nahin karti, kyunke mulk ka qanoon aur dastoor aisi cheez hai jis par laakhon karodon logon ki zindagi ka daromadar hai aur is se un ki bhalai munsalik hai, aur zahir hai ke woh nizam aur qanoon jis ke saath laakhon karodon logon ki bhalai judi hui hai, us ke khilaf baghawat sirf kisi sharpasand ki azadi ke liye nahin bardasht ki ja sakti. Isi liye har mulk apne baghi ko phansi ya qatl ki saza deta hai.
Jis daleel ki bunyad par tamaam mumalik apne khud saakhta dastoor aur qanoon se baghawat karne wale ko phansi ya qatl ki saza de sakte hain, aakhir usi daleel ki bunyad par Islami mulk apne aur saari kainaat ke banane wale Khuda ke nazil kiye hue dastoor aur qanoon se baghawat karne wale ko saza kyon nahin de sakta?
Yeh jis tarah har state ka haq hai usi tarah Islami state ka bhi haq hai aur yeh koi na-qabil-e-fahm maamla nahin jis mein bila-wajah ki baat badhai jaye.
Jahan tak rahi yeh baat ke Islam ki tarah agar sabhi mazhab wale murtad ko qatl ki saza dene lagen to dawat o tabligh ke raaste band ho jaenge aur jis tarah koi Muslim dusre mazhab ko nahin apna payega usi tarah doosre log bhi Islam qubool nahin kar payenge, aur natija ke taur par Islam ko nuqsan hoga — yeh bhi ek bila-wajah ka andesha hai ke aisi surat-e-haal mein doosre log Islam qubool nahin kar payenge aur Islam ka nuqsan hoga. Haqiqat yeh hai ke is surat mein bhi Islam ka faida hi hoga. Kyunke aisi surat mein sirf wohi log Islam qubool karenge jin ka dil us ki sadaqat aur haqqaniyat par mukammal taur se mutmain hoga aur is par woh apni jaan nichhwar karne ke liye bhi tayyar honge, aur aise sache log hi haqeeqat mein kisi bhi qaum aur millat ki asal ponji hote hain. Tareekh bataati hai ke Islam ke shuru mein yahi surat-e-haal thi jis ki wajah se Islam ko aise jiyale mile jinhon ne Islam ke parcham ko poori duniya mein lehraaya. Aur agar jis tarah Islam apne hudood mein kufr ki tabligh ko mana karta hai usi tarah doosre log bhi karen to phir sirf wohi log is maidan mein qadam rakhenge jo Naar-e-Namrood mein koodne ka hausla rakhte honge aur natije mein kisi qaum ke ek ya do fard nahin balki poori poori qaum daaman-e-Islam mein aa jaegi.
Share........

Related Topics

Begair dekhe Allah ko kaise maane? Quran me kaafiro ko qatal karne ka hukm? Islam me parda kyun? Qurbani me jaanwaro ko kaat kar kya faaida? Ek se ziyadah shadi,Aurato ke saath naa-insaafi hai? Islam me talaaq kyun? Islami sazaayen insaaniyat ke saath zulm hai? Murtad ki saza qatal kyun? Huzur ﷺ par aatank aur be-rahmi ka ilzam Yahudi Sardar Abu Raafe' ka qatal? Qabila Ukal Ya Urainia Ke Logo Ko Dard-naak Saza