Qabila Ukal Ya Urainia Ke Logo Ka Qatal Ka Waqi’ah: Qabeela Ukal aur Uraina ke logon ko jis dard naak tareeqe se saza di gayi ke pehle un ke haath pair kaate gaye, un ki aankhon mein garam salaayi pheri gayi aur inhen tarap tarap kar marne ke liye chhor diya gaya, yahan tak ke pani maangne par pani tak nahi diya gaya. is ki wajah se kuchh log to is waqea ko yeh keh kar inkaar kar dete hain ke huzoor Sallallahu alaihi wasallam jinhein tamam Jahan ke liye rehmat bana kar bheja gaya, woh is tarha saza nahi de satke, yeh un ki shaan-e-rehmat ke khilaaf hai. aur jo log is waqeye ko sahih maante hain, woh is ki wajah se huzoor rehmat aalam Sallallahu alaihi wasallam par be rehmi ka ilzaam lagate hain aur sath hi na-insafi ka bhi .
is liye hum pehle is waqea ko bayan karenge aur phir is par kiye gaye aitraaz ka jaiza lenge .
Hazrat Anas radhi Allahu anhu bayan karte hain ke kuchh log ukal ya urainah (qabeelah) ke Madinah mein aaye aur bemaar ho gaye. Huzoor Sallallahu alaihe wasallam ne unhein Laqah mein jane ka hukm diya [jahan bait ul maal ke doodh dene wali oontniyan thin] aur farmaya ke wahan oonton ka doodh aur peshab piyein. chunancha woh Laqah chale gaye aur jab achhe ho gaye to Rasoolullah Sallallahu alaihe wasallam ke charwahe ko qatl kar ke woh janwaron ko haank kar le gaye. Subah subah Rasoolullah Sallallahu alaihe wasallam ke paas (is waqia ki) khabar aayi. to aap ne unke peeche aadmi dauraaye. din chadhe woh Nabi kareem Sallallahu alaihe wasallam ki khidmat mein pakar kar laaye gaye. aap ke hukm ke mutabiq unke haath paon kaat diye gaye aur aankhon mein garam salakhen pher di gayin aur (madinah ki) pathrili zameen mein daal diye gaye. (pyaas ki shiddat se) woh pani maangte the magar unhein pani nahi diya jata tha. [sahih Bukhari, kitab al wudhu, bab abwal al ibil wal dawab, hadees: 233]
is waqia par ye aitraaz kiya jata hai ke agar un logon ne Huzoor Sallallahu alaihe wasallam ke charwahe ko qatl kiya tha to is ke badle aap bhi un logon ko qatl karwa dete, lekin aap ne pehle unke haath pair kaate, unki aankhon mein garam salaiyan pherwain aur phir unhein tadap tadap kar marne ke liye chhod diya, ye to rehem ke khilaf hai aur na insafi bhi hai.
Jawab: in baghi logon ko jo sazaaen di gayin, in ko dekhne se pehle in ke jurmo ko samjhen jo in ghaddar aur baghi logon ne anjam diye. kyunke jurm se aankhen band kar ke sirf saza ko dekhne se lazmi taur par wahshat hogi.
Jurm number 1: in logon ne islamic government ke sarbarah ki taraf se muqarrar kiye gaye logon ko qatl kiya.
Jurm number 2: Bait ul mal ke oonton ki chori kiya, yani sarkari khazana ko loota.
Jurm number 3: islam lane ke baad murtad hue, yani islami riyasat ke qawaneen ke khilaf baghawat kiya.
Jurm number 4: in logon ne Huzoor sallallahu alaihi wasallam ki taraf se muqarrar kiye gaye charwahon ko sirf qatl nahi kiya balki is se pehle un ki aankhen phod di aur unhein tadpa tadpa kar maara. jaisake sahih muslim ki riwayat hai ke:Huzoor sallallahu alaihi wasallam ne un ki aankhein is liye khatam karwaya kyunke un logon ne Huzoor sallallahu alaihi wasallam ke charwahon ki aankhein phor di thin. [sahih muslim, kitab al-qasamah wal-muharibeen wal-qisas wal-diyat, bab hukm al-muharibeen wal-murtadeen, hadees: 4360]
Ab itne saare sangeen jurm ke anjaam dene logon ko sangeen saza to mile gi hi. rahi baat ye ke aisa karna Huzoor sallallahu alaihi wasallam ki shan-e-rahmat ke khilaf hai. ye haqiqat se aankhein mondh lena hai kyunke be shak Huzoor sallallahu alaihi wasallam "rahmatul lil aalameen" hain. lekin saath hi wo riyasat-e-madina ke hakim aala bhi hain jin ke zimme Allah ke nazil kardah qanoon ko nafiz karna aur mazloomon ko zalim se mukammal haq aur insaf dilana hai. Huzoor sallallahu alaihi wasallam ki seerat -e-tayyaba padhne wala har shakhs jaanta hai ke Huzoor sallallahu alaihi wasallam ne kabhi apni zaat ke liye kisi se inteqam nahi liya lekin jab koi Allah ke hudood mein se koi hadd todta tha to aap Allah ke liye us par saza nafiz farmate the. aur un logon ke saath Huzoor sallallahu alaihi wasallam ne bas wahi kiya jo un zalimon aur ehsan faramosh logon ne kiya tha jaisa ke Allama Badruddin aini ne "umdatul qari" mein bayan farmaya ke:
Un logon ne Huzoor sallallahu alaihi wasallam ke charwahe hazrat Yasar ke haath pair kaat diye, un ki zaban aur aankh mein kaante chubha diye aur un ko tarap tarap kar marne ke liye chhod diya yahan tak woh inteqal kar gaye, to Huzoor sallallahu alaihi wasallam ne bhi un ke saath aisa hi kiya. [Umdatul Qaari, sharah Bukhari]
Is liye ise be rehmi ya na insafi kehna ya to haqeeqat se be khabri ki wajah se hai, jis ka ilaaj jan'na hai. Ya phir mahz bughz o inad ki wajah se hai jis ka koi ilaaj nahin.
Aaj ki duniya mein sangeen se sangeen tar jurm karne walo ka graph din ba din barhta ja raha hai, kyunke jhooti insaniyat ke naam par mujrimoon se hamdardi ne un ke hausle buland kar diye hain aur natije mein har din jaraaim peshah log insaniyat ki hurmat ko paamaal kar rahe hain. Is ke bawajood modernism ka bhoot logon ke saron se nahin utar raha hai. Magar Islam jo haqeeqi insaniyat aur aman o aashti ka alam bardaar hai, mujrim ko us ke jurm ki qarar waqai saza deta hai aur mujrim se hamdardi ko aman o aashti se dushmani ke mutaradif samajhta hai. Is liye Allah ta’ala ne hukm diya ke qatil ka sar bila ta’ammul qalam kiya jaaye kyunke is tarah tum ek mujrim jaan ko khatm kar ke hazaron jaano ko mehfooz kar loge. Irshaad baari ta’ala hai: Aye aqal waloo! Qisas lene mein tumhare liye zindagi hai. [surah baqrah, ayat:179]
Huzoor aaqa-e-rahmat sallallahu alaihi wasallam ne in sharkash aur baghiyon ko sakht saza diya taake ye waqia qatal o ghaarath geeri karne walon ke liye nishan e ibrat ban jaye aur woh islami riyaasat mein kisi bhi aadmi ke jaan o maal se khelne ki himmat na kar saken.
Share........

Related Topics

Begair dekhe Allah ko kaise maane? Quran me kaafiro ko qatal karne ka hukm? Islam me parda kyun? Qurbani me jaanwaro ko kaat kar kya faaida? Ek se ziyadah shadi,Aurato ke saath naa-insaafi hai? Islam me talaaq kyun? Islami sazaayen insaaniyat ke saath zulm hai? Murtad ki saza qatal kyun? Huzur ﷺ par aatank aur be-rahmi ka ilzam Yahudi Sardar Abu Raafe' ka qatal? Qabila Ukal Ya Urainia Ke Logo Ko Dard-naak Saza